کہ صورت د محمد نه وای پيدا

کہ صورت د محمد نه وای پيدا — پيدا کړې به خدای نه وای دا دنيا

کل جهان د محمد په روی پيدا شو — محمد دی د تمام جهان آبا

نبوت په محمد باندې تمام شو — نشته پس له محمده انبياء

نور هاله د محمد و په جهان کښې — چې بوی نه و د آدم او د حوا

په صورت کې آخرين دی پيدا شوی — په معنی کښې اولين دی له هر چا

خدای يې مه ګنه بې شکه چې بنده دی — نور يې ټول واړه صفات دي په رښتيا

که نبی دی که ولی دی که عاصی دی — محمد دی د همه واړو پيشوا

چې يې دين د محمد دی قبول کړی — جنتی دی که فاسق دی که پارسا

محمد د ګمراهانو رهنما دی — محمد دی د ړندو د لاس عصا

که رڼا د پیروی د محمد ده — ګناه نشته په جهان بله رڼا

محمد د بېچاره وو چاره ګر دی — محمد دی هر دردمند لره دوا

زه رحمان د محمد د خاکروب يم — که مې خدای نه کا له دې دره جدا